|
Tuaj Xyuas Tsev Kho Mob Yuav Npaj Li Cas
Muaj ib txhia me-nyuam txhawj thiab ntshai heev, yog tias tham txog yuav tuaj ntawm tsev kho mob. Tiamsis, nws muaj ntau yam uas koj tus ua niam ua txiv yuav pab tau koj tus me-nyuam kom tsis txhob ntshai ntsig txog yuav coj nws tuaj rau ntawm no. Ib yam uas peb pom tias yuav pab tau kom koj tus me-nyuam tsis txhob txhawj thiab ntshai yog kom koj thiab koj tsev neeg coj nws tuaj xyuas peb qhov chaw kho mob no ua ntej yuav coj nws tuaj kho. Yog koj xav paub ntxiv ntsig txog qhov uas yuav tuaj xyuas tsev kho mob ua ntej no, caw koj hu rau cov xov tooj nram qab no.
Children’s West (612) 930-8700; Sijhawm tuaj xyuas tsev kho mob yog hnub ib (Monday) thaum 6:30 tsaus ntuj.
Children’s - St. Paul (651) 220-6115; Sijhawm tuaj xyuas tsev kho mob yog hnub plaub (Thursday) thaum 5:30 tav su.
Children’s - Minneapolis (612) 813-6200; Sijhawm tuaj xyuas tsev kho mob yog hnub ib (Monday) thaum 6:30 tsaus ntuj.
Tej Lus Yuav Tsum Nco Ntsoov Cia
- Nco ntsoov tias koj yuav tsum paub qhia rau koj tus me-nyuam ntsig txog tej ntsiab lus tias vim li cas nej thiaj li yuav tsum tuaj xyuas tsev kho mob. Yog tias koj tsis paub meej, nrog cov Kws Kho Mob thiab cov neeg tu cov neeg mob tham kom koj paub zoo. Thaum koj paub meej thiab tsis ntshai lawm, koj tus me-nyuam yuav pom li no thiab nws thiaj li yuav tso siab.
- Ua ntej tshaj plaws, nug koj tus me-nyuam saib nws xav li cas ntsig txog qhov ua nej yuav tuaj xyuas tsev kho mob no. Nrog koj tus me-nyuam sib tham kom zoo. Yog tias kev ua si, kev kos duab thiab ntawv yuav pab tau koj tus me-nyuam qhia koj ntsig txog ntawm nws qhov kev txhawj, tso plhuav lus rau nws siv tej no los pab. Tiamsis, nco ntsoov tias koj yuav tsum siv tej lus uas kom nws nkag siab. Yog nws muaj lus nug, yeej meem koj nws nug. Yog tias koj qhia qhov tseeb rau koj tus me-nyuam, nws yuav tsis ntshai thiab yuav mloog koj lus.
- Pab qhia rau koj tus me-nyuam tias qhov uas ib tus neeg raug ntshai thiab raug mob tsis yog tib yam. Nco ntsoov qhia rau nws tias koj yeej zoo siab hlo xav tham nrog nws ntsig txog tej uas yuav tshwm sim rau nws thiab qhov uas sib tham no yuav ua kom nws tsis txhob poob siab.
- Feem coob tej me-nyuam yau lawv yuav txhawj heev yog tias lawv yuav tawm kev mus rau lwm qhov, tseg niam tseg txiv rau ib qho. Tejzaum, lawv tseem nkag siab yuam kev ntsig txog ntawm qhov uas lawv tuaj xyuas lub tsev kho mob thiab. Vim li no, nco ntsoov qhia koj tus me-nyuam tias tsis yog tim nws ua rau nws mob. Qhia nws hais tias koj yeej yuav nrog nws tuaj ua ke rau ntawm tsev kho mob no thiab yuav nrog nws los tsev ua ke.
- Thaum koj nrog koj tus me-nyuam tham ntsig txog tuaj pw tim tsev kho mob no, coj tag nrho koj cov me-nyuam los tham tsis hais tus ua mob xwb. Tejzaum, cov hlob los yog cov yau tus uas mob ntawd, lawv kuj muaj kev txhawj xeeb thiab.
Lub sijhawm uas nej tuaj nyob rau tim tsev kho mob lawm, yeej meem cia koj tus me-nyuam nws ua nws si raws li yav tas los. Tejzaum, nqa tej khoom ua si tom tsev tuaj, los yog nqa tej ntawv tom tsev kawm ntawv tuaj thiab cia nws tej phoojywg tuaj xyuas nws yuav pab tau nws thiab. Yog tias koj tus me-nyuam muaj ib yam khoom uas yog yam nws nyiam heev tom tsev, xws li khoom tsiaj ua si, los yog pam, nco ntsoov nqa nrog nws tuaj. Yog tias yuav coj koj tus me-nyuam tuaj phais ib yam dabtsi ntawm nws ib ce, nco ntsoov nqa nws lub khob haus dej, nws lub txiv mis zom ntawm ncauj, los sis nws lub raj mis nrog nws.
Npaj ua tej yam kev zoo siab rau nws thaum nws tawm ntawm tsev kho mob los tsev lawm.
|
|
|
