CEM QUAV

Article Translations: (English) (Spanish) (Somali)

Cem quav yog dab tsi?

Cem quav yog kev muaj teeb meem rau kev tso quav (los kuj tau hu ua kev txav mus los ntawm plab hnyuv los sis kev tawm rooj). Nws yog cov teeb meem raws li ib txwm uas nquag pom muaj heev rau hauv cov me nyuam yaus thaum hloov pauv lawv li khoom noj los sis kev nyiam khoom noj. Dhau li no lawm nws kuj yog teeb meem raws li ib txwm thaum cov me nyuam tab tom kawm paub txog txoj hauv kev siv chav dej los sis pib mus kawm ntawv, vim qee tus me nyuam tsis xav tso quav nyob rau ntawm tsev kawm ntawv thiab npo quav cia.

Dab tsi yog cov tsos mob ntawm qhov cem quav?

Tej zaum koj tus me nyuam yuav muaj:

• mob thaum tso quav
• quav tawv, ua thooj, ua lub zoo li pob zeb
• mob plab (mob plab hnyuv)
• tsis tso quav heev (tsuas yog ib zaug nyob rau hauv 3 txog 7 hnub)
• tso quav lo rau hauv lub ris hnav tuaj hauv qab

Qee zaus thaum cem quav heev, yuav ua rau cov me nyuam cov tawv nqaij ncig lawv lub qhov quav to (lub qhov uas quav tawm los) thiab tej zaum koj yuav pom ntshav lo rau lawv cov quav los sis daim ntawv so quav.

Yog tias koj tus me nyuam cem quav mus li ib ntus, ces quav tuaj yeem nyob puv mus rau hauv lawv txoj hnyuv thiab cov hnyuv ntawd yuav su loj tuaj. Qee zaus cov me nyuam yuav tsum tau nkag mus kho hauv tsev kho mob txhawm rau “ntxuav txoj hnyuv” txhawm rau los ntxuav cov quav tawm.

Kuv yuav pov thaiv qhov cem quav rau kuv tus me nyuam li cas?

Sib tham nrog koj tus kws pab kho mob los sis tus kws tu mob txhawm rau los pab koj txiav txim siab tej yam uas yuav pab tau zoo tshaj plaws rau koj tus me nyuam. Lub khoos kas uas zoo txhawm rau pov thaiv qhov cem quav tej zaum yuav siv ntau txoj hauv kev, sij hawm thiab kev ua sib ntev los nrhiav tej yam uas pab tau zoo. Txhua tej tus me nyuam lub khoos kas hnyuv yuav sib txawv. Sim siv ntau txoj hauv kev kom txog thaum nrhiav tau ib qhov kev muaj yeej rau koj tus me nyuam.

1. Yog tias koj tus me nyuam tau txais kev cob qhia txog kev siv chav dej lawm, ces kom lawv zaum rau saum lub dab tso quav kom ntev li 5 txog 10 feeb tom qab noj tshais thiab noj hmo. (Kev noj khoom noj yuav pab ua rau txoj hnyuv khoob.)
2. Yog tias koj tus me nyuam txhais taw tsis cuag hauv plag tsev thaum zaum saum lub dab tso quav, ces tso lub thawv los sis lub tog tiag taw rau hauv qab txhais taw txhawm rau kom ob lub hauv caug siab zog lub duav me ntsis. Qhov zaum khwb ywb no yuav pab ua rau tso quav tau zoo. Dhau li no lawm nws kuj yuav pab ua rau koj tus me nyuam hnov tau tias tau txais kev txhawb nqa zoo txhawm rau kom lawv tau so thiab cov leeg txhob nruj thaum uas zaum rau saum lub dab tso quav.
3. Qhuas koj tus me nyuam rau kev zaum raws li lub sij hawm uas tau txiav txim, txawm tias lawv tsis tso quav los xij. Tej zaum koj yuav tau siv qhov kev muab khoom plig, xws li cov duab nplaum.
4. Ntxuav daim tawv nqaij kom huv tom qab txhua zaus tso quav los sis tso quav rau hauv ris. Qhov no yuav pov thaiv kev ua rau daim tawv nqaij ua pob khaus. Thaum uas daim tawv nqaij raug mob, tej zaum cov me nyuam yuav npo quav, uas tsim ua rau ua mob loj ntxiv.
5. Pab txhawb nqa kev ua si thiab kev tawm dag zog kom tsis tu ncua; kev tsis ua ub ua no muaj feem uas yuav ua rau cov hnyuv ua hauj lwm qeeb.

Kuv tus me nyuam tsim nyog noj dab tsi txhawm rau los pov thaiv qhov cem quav?

Kom koj tus me nyuam haus yam ua kua kom ntau xws li dej thiab kua txiv qaum, tshwj xeeb tshaj yog txiv ev paus, txiv phias, txiv tshaws lij, txiv nklej, los sis txiv nkhawb. Ua koom ntseeg siab tias koj tus me nyuam noj cov txiv hmab txiv ntoo, cov zaub, thiab cov khoom tsim los ntawm noob qoob loo txhua hnub, uas yuav pab ua rau cov quav muag thiab tso tau yooj yim. Tsis txhob siv cov hmoov khoom noj txhab ntxiv uas muaj fais npawj ntau thiab cov khob noom nplaum; feem ntau lawm cov no yuav tsim rau cov quav ua thooj loj ntxiv thiab tso tawm nyuaj rau cov me nyuam yaus.

Txhab ntxiv cov xua (nplej los sis pob kws) rau cov khoom noj txhua hnub txhawm rau kom muaj fais npawj ntxiv. Tov cov xua mus rau hauv cov khoom noj noob qoob loo, cov ncuav khev, has npaws nkawj, cov casserole, los sis lwm yam khoom noj, los sis noj kiag tib yam ntawd xwb. Cov txiv phias, cov txiv xab tos npaws lij, noob taum, noob taum mog, thiab qos liab yog ib yam khoom noj ntxiv uas muaj fais npawj.

• Cov me nyuam yaus uas hnub nyoog qis dua 6 xyoo: xua 2 diav me nco - nco txhua hnub
• Cov me nyuam uas muaj hnub nyoog 6 xyoo los sis tshaj ntawd: xua 3 diav me nco - nco txhua hnub

Muaj ciam txwv rau cov khoom noj uas pom zoo noj xws li cov txiv ev paus, txiv tsawb, mov, cov zaub ntug hauv paus uas ua siav lawm, mis nyuj khov, thiab ces las tis (xws li cov khoom noj txom ncauj txiv hmab txiv ntoo thiab Jell-O®). Muaj ciam txwv rau mis nyuj thiab cov khoom noj tsim los ntawm mis nyuj los sis hloov cov khoom noj mis nyuj mus noj cov khoom noj uas tsis muaj mis nyuj thiab cov khoom noj uas tsim los ntawm noob taum pauv kom txog thaum tsis cem quav lawm tso. Cov pem thaj lactose nyob rau hauv cov khoom noj mis nyuj yog pom zoo noj rau qee leej me nyuam yaus.

Kuv tsim nyog ua dab tsi los pab kuv tus me nyuam tso quav?

Nrog koj tus me nyuam tus kws tu mob los sis tus kws pab kho mob sib tham hais txog qhov tias seb yuav siv qhov twg ntawm cov hauv kev no thiab yuav siv cov hauv kev ntawd thaum twg thiab siv li cas:

• Tshuaj ua kom quav muag: Qhov tshuaj noj ntawm ncauj uas pov thaiv quav tawv. Tuaj yeem noj tau tas li. Koj tus kws muab kev pab cuam kho mob tuaj yeem qhia tau rau koj tias qhov tshuaj twg thiab noj ib zaug ntau npaum cas thiaj li zoo tshaj plaws rau koj tus me nyuam.
• Tshuaj zoo cem quav: Qhov tshuaj noj ntawm ncauj uas pab ua rau lub cev thawb cov quav tawm los.
• Tshuaj ntsaws qhov quav: Lub tshuaj uas ntsaws mus rau hauv ntu hnyuv kawg uas pab ua rau txoj hnyuv ua hauj lwm thiab tsim ua rau nws zuaj, uas ua rau cov quav tawm los.
• Tshuaj txau rau qhov quav: Qhov tshuaj ua kua uas txau mus rau hauv ntu hnyuv kawg uas pab ua rau txoj hnyuv ua hauj lwm. Tsis txhob siv cov tshuaj txau rau qhov quav kom txog thaum koj tau nrog tus kws kho mob los sis tus kws tu mob sib tham tso.

Kuv yuav tsum paub dab tsi ntxiv?

Dhau li no lawm muaj ntau leej me nyuam uas tso zis rau hauv ris kuj yog cem quav ib yam thiab. Cem quav tuaj yeem tsim ua rau tso zis rau saum txaj vim lub zais zis thiab txoj hnyuv nyob sib npuab rau hauv plab. Thaum tus me nyuam cem quav, tej zaum cov quav tawv yuav mus nyob puv rau hauv ntu hnyuv kawg, uas ua rau lub zais zis toov tsis tau zis ntau lawm. Qhov nruj ntawm cov quav tej zaum yuav tsim ua rau lub zais zis nruj, uas ua rau hnov tau tias yuav tsum tau tso zis tawm kom khoob.

Yog tias koj tus me nyuam yuav tsum tau nkag mus kho hauv tsev kho mob txhawm rau kho lawv qhov cem quav, ces muaj feem uas nws yuav siv sij hawm ntev. Nws yuav siv sij hawm ntxiv rau koj tus me nyuam txoj hnyuv los pib ua hauj lwm raws li ib txwm dua ib zaug ntxiv thiab rov me los li qub. Muab cov tshuaj ua kom quav muag thiab cov tshuaj zoo cem quav rau koj tus me nyuam noj txuas mus ntxiv thiab hloov pauv txoj kev ua neej nyob mus ntev li ntau lim tiam txog ntau hli tom qab lawv tau kho mob hauv tsev kho mob. Koj tus kws muab kev pab cuam kho mob yuav pab txiav txim tej cov tshuaj uas zoo tshaj plaws rau koj tus me nyuam thiab seb lawv tsim nyog yuav noj cov tshuaj ntawd txuas ntxiv mus ntev npaum li cas. Koj tus me nyuam yuav tsum tau mus ntsib tus kws kho mob uas muaj kev paub tshwj xeeb txog plab hnyuv (kws kho mob plab hnyuv) yog tias tseem cem quav txuas mus ntxiv.

Kuv tsim nyog hu rau lub chaw kuaj mob thaum twg?

Hu rau lub chaw kuaj mob yog tias koj muaj lus nug los sis kev txhawj xeeb ntxiv, los sis yog tias koj tus me nyuam muaj:

• Ntshav lo rau hauv cov quav
• Ntuav
• Tseem tso quav lo rau hauv lub ris hnav tuaj hauv qab txuas mus ntxiv
• Mob plab tshiab los sis mob plab huam loj zuj zus tuaj

Los sis, yog tias:

• cem quav txuas mus ntxiv thiab tsis tso quav ntev li 2 hnub
• koj pib muaj kev sib cav sib ceg nrog rau koj tus me nyuam hais txog kev tso quav

Puas muaj lus nug?

Daim ntawv no tsis yog qhia kiag txog koj tus me nyuam tiam sis nws yog qhia cov ncauj lus dav. Yog tias koj muaj tej lus nug, thov hu rau lub chaw kuaj mob.

tau hloov kho 3/2024

Back To Top