QALLIINKA ILKAHA: TILMAAMAHA BIXITAANKA

Article Translations: (English) (Spanish) (Hmong)

Maxaan filan karnaa ka dib qalliinka ilkaha?

Haddii ilkaha laga soo bixiyo ilmaha, dhiigbax ayaa ku dhici kara maalinta ugu horreysa. Sii cabitaan qabow ama jallaatada dhuban ee Popsicles® si uu dhiigbaxu uga joogsado. Haddii dhiiggu sii socdo, ku dabool faashad isku laaban meesha oo gacanta kula qabo ilaa 10 daqiiqo. Haddii dhiiggu ka joogsan waayo, taleefan u soo dir dhakhtarka.

Lallabo (calool-xanuun) iyo matag (hunqaaco) ayaa caadi ahaan ku dhici kara 24ka saac ee ugu horreeya qalliinka ka dib. Haddii ilmuhu matago, dhiig ayaa soo raaci kara (wax guduudan ama madow oo ah kafee).

Afka ayaa ilmaha xanuuni kara ilaa dhowr maalmood. Bishimaha iyo wejiga hoose ayaa barari kara hal ama laba maalmood ka dib qalliinka. Baraf ama maro qoyan dul saar bararka bishimaha haddii loo baahdo maalinta koowaad.

Waraaqda Tilmaamaha Bixitaanka ka eego wixii talo iyo tilmaamo gaar ah oo ku saabsan xakameynta xanuunka iyo goorta aad mar kale la kulmi doontaan dhakhtarka qalliinka.

Sidee baan qalliinka ka dib u daryeeli karaa ilkaha ilmahayga?

Maalinta qalliinka, ilmaha maro qoyan uga soo nadiifi ilkaha, ama waxaad ugu soo luqluqi kartaa biyo diirran.

24 saac ka dib, waa in aad burush ugu cadeydo ilkaha ugu yaraan laba jeer maalintii. Haddii uu daboolka ama taajku jilco ama ka soo dhaco ka hor inta aysan ilkuhu u soo bixin, meel ku xafid taajka oo taleefan u soo dir dhakhtarka ilkaha.

Muxuu ilmuhu cuni karaa?

Ku dhiirrigeli cabitaan qabow maalinta ugu horreysa. Marka ilmuhu diyaar u yahay, ugu dar cunto jilicsan oo si fudud loo calalin karo (cunto aan ahayn wax culus, adag, ama qallafsan), sida:

• tufaax shiidan
• rooti
• miraha gasacadeysan
• jiis, diyaarsan
• siiriyaal qaboow
• ukun, si jilicsan u karsan ama u shiilan
• jalaatiin (sida Jell-O®)
• hilib shiidan oo lagu qooyey maraq ama dareere
• makarooni iyo jiis
• baradho shiidan
• labaniyad
• miro barafeysan
• maraq
• cagaar, si fiican u karsan

Cuntada caadiga ah ayaad ilmaha siin kartaa marka uu cuni karo. Haddii taajka daboolka ah ee ilmaha uu yahay macdan, ka ilaali oo yaan la siin xanjo iyo nacnac ah dhegdheg sida karamel, nacnaca adag, ama nacnacqori.

Sidee buu noqon karaa dhaqdhaqaaqa ilmaha?

Dhaqdhaqaaq fudud ayuu ilmuhu sameyn karaa maalinta qalliinka oo ka dibna waa caadi.

Goormaan la soo xiriirayaa dhakhtarka ilkaha?

• dhiigbax afka ah oo aan ku joogsaneyn cadaadis
• xanuun ama danqasho ku soo kordhaaya afka
• xanuun aan uga yaraan karin daawadii xanuunka ee loo qoray
• kabuubyo kasta oo ah wejiga
• calaamadaha ama xanuunka COVID-19 marka laga helo ilaa 14 maalmood ka dib qalliinka

Goormaan la xiriirayaa dhakhtarka?

• qandho ka sarreysa 102° F (38.8° C) oo uusan Tylenol ka caawin karin
• calaamadaha ama xanuunka COVID-19 marka laga helo ilaa 14 maalmood ka dib qalliinka
• markuu ilmuhu kaadin waayo ugu yaraan hal mar 8 saac oo kasta
• calool-xanuun ama matag joogto ah
• neefsashada markay dhib ku noqoto – garaac 911

Su'aalo?

Waraaqdan gaar kuma aha ilmahaaga oo keliya ee waa wax ah macluumaad guud. Haddii aad qabto wax su'aalo ah fadlan taleefan u soo dir kilinigga.

Wakhtigii qoraalkan 6/2020

Back To Top