NTUAV THIAB RAWS PLAB

Article Translations: (English) (Spanish) (Somali)

Cov mob ntawd yog dab tsi?

Ntuav (ntuav tawm pov tseg) thiab raws plab (qhov ua rau tso quav ntau ntxiv thiab tso quav ua kua los sis tawm rooj heev tam sim ntawd) yog cov tsos mob uas muaj nyob rau hauv ntau cov kev muaj mob, uas suav nrog cov mob uas tsis yog kev kis kab mob. Feem ntau lawm, tej zaum cov mob ntawd tshwm sim los ntawm tus vais lav los sis tus npev taws lias (kab mob) nyob rau hauv cov khoom noj los sis los ntawm cov khoom noj “tsis pom zoo” nrog rau lub plab (ntsim dhau lawm, daw dhau lawm, los sis cov khoom noj tshiab). Dhau li no lawm ntuav kuj tshwm sim los ntawm txoj hnyuv (cov hnyuv) txaws.

Ntuav feem ntau yuav tsum nyob rau hauv 6 txog 24 teev. Nrog rau cov kev muaj mob los ntawm vais lav, feem ntau lawm kev raws plab nyiam pib nyob rau 8 txog 12 teev tom qab pib ntuav thiab tej zaum yuav mob mus ntxiv ntev li 5 txog 7 hnub.

Ntuav thiab raws plab tuaj yeem tsim ua rau lub cev qhuav dej (ua rau “qhuav”), uas tuaj yeem yog qhov kev phom sij. Cov me nyuam yau npaum cas, ces tuaj yeem tshwm sim qhov lub cev qhuav dej ceev npaum ntawd.

Kuv tsim nyog saib xyuas kuv tus me nyuam li cas?

Saib cov tsos mob ntawm qhov lub cev qhuav dej. Yog tias pom koj tus me nyuam muaj cov tsos mob ntawm qhov lub cev qhuav dej, ces hu rau lawv tus kws kho mob.

Cov tsos mob ntawm qhov lub cev qhuav dej uas me mus txog rau qib nrab:

• tsis tso zis (los sis pawm tsis ntub) ntev li 8 teev
• ob daim di ncauj qhuav
• sab hauv ntawm lawv lub qhov ncauj qhuav thiab nplaum

Cov tsos mob ntawm qhov lub cev qhuav dej uas yog mob loj:

• tsis muaj kua muag thaum quaj
• sab hauv ntawm lub qhov ncauj qhuav heev (tsis los qaub ncaug)
• tho muag
• qhov hnyav poob qis
• tsis muaj zog (muaj zog me – me xwb)
• tsa sawv nyuaj
• tsis meej pem
• qaug qeb (sawv los zaum los sis taug kev nyuaj, ib ce xoob)

Kev kho mob rau tus me nyuam nyob ntawm tsev yam uas tsis muaj qhov lub cev qhuav dej:

Muab yam ua kua rau haus los hloov pauv cov kua uas tau ntuav thiab/los sis raws plab tawm lawm. Yog tias koj tus me nyuam mos muaj hnub nyoog qis dua 3 hlis, ces hu rau koj lub chaw kuaj mob los sis lub chaw pab cuam kev hu xov tooj txhawm rau txiav txim seb qhov teeb meem ntawd loj npaum li cas, thiab seb koj puas tsim nyog coj koj tus me nyuam mos mus ntsib tus kws kho mob.

Cov yam ua kua uas zoo tshaj plaws uas yuav tau siv:

Cov me nyuam uas pub niam mis uas tsuas ntuav li 1 los sis 2 zaug xwb tsim nyog pub mis txuas mus ntxiv. Tej zaum koj yuav tsum tau pub mis los ntawm txhua tej sab mis kom luv zog thiab pub kom heev ntxiv. Yog tias ntuav 3 zaug los sis ntau tshaj ntawd, ces tso tseg kev pub mis thiab muab cov tshuaj kho qhov lub cev qhuav dej rau haus (xws li Pedialyte® los sis lwm hom tshuaj) raws li tau qhia rau hauv qab.

Tso koj cov kua mis yog tias tsis tuaj yeem pub tau mis thiab muab ntim khaws cia rau hauv lub tub txau dej khov txhawm rau cia pub koj tus me nyuam mos tuaj tom qab. Sai npaum li sai tau thaum uas koj tus me nyuam mos tuaj yeem haus tau yam ua kua, ces cia rov qab mus noj koj lub mis raws li ib txwm. (Cim tseg: Nws yeej tsis ua cas uas yuav pub mis rau me nyuam noj txawm tias koj tsis xis neej los xij—koj cov kua mis muaj cov roj ntshav tiv thaiv kab mob uas yuav pab ua rau koj tus me nyuam mos zoo ceev zog tuaj.)

Rau cov me nyuam uas pub mis hmoov, muab cov tshuaj kho qhov lub cev qhuav dej rau haus xws li Pedialyte® (koj tuaj yeem yuav tau cov tshuaj ntawd nyob rau ntawm cov khw muag koom noj thiab cov khwv muag tshuaj feem ntau yam uas tsis muaj ntawv sau yuav). Muab 1 txog 2 oos (30 txog 60 mis lis liv) txhua - txhua 10 txog 15 feeb. Yog tias koj tus me nyuam mos tsis tuaj yeem haus tau qhov muab ntau li no, ces sim muab kom tsawg zog (1 txog 2 diav me) thiab muab kom heev zog. Yog tias koj tus me nyuam mos tsis tuaj yeem haus tau qhov muab me li no, ces hu rau lub chaw kuaj mob.

Yog tias koj tus me nyuam mos tuaj yeem haus tau yam ua kua, ces maj mam muab kom ntau zuj zus ntxiv thiab muab nyob rau lub sij hawm ncua ntawm kev pub txhua zaus. Nce ntxiv qhov ntau ua ob npaug nyob rau txhua tej zaus uas pub txhua - txhua teev. Pub tas li txuas mus ntxiv kom txog thaum koj tus me nyuam tuaj yeem noj tau ntau raws li ib txwm.

Qhov yuam kev raws li ncua dav yog muab yam ua kua ntau dhau lawm, dhau ntawm kev maj mam muab kom ntau zuj zus tuaj. Qhov no tuaj yeem tsim ua rau ntuav ntxiv.

Yuav muaj qee cov me nyuam uas hnub nyoog siab tshaj li 6 hli tsis kam haus qhov tshuaj kho lub cev qhuav dej. Nyob rau xwm txheej ntawd, muab me - me yam ua kua uas lawv haus tas li txuas mus ntxiv (tshwj tsis yog cov kua txiv hmab txiv ntoo). Pib muab li 1 los sis 2 ounces rau ib zaug kev pub thiab pub kom heev ntxiv. Tsis txhob muab dej ntshiab nkaus xwb.

Tej zaum nws yuav tsis pab hloov pauv cov mis hmoov, tab sis tej zaum koj tus kws kho mob los sis tus kws tu mob yuav qhia kom sim.

Zam tsis txhob haus yam uas kua uas muaj piam thaj ntau thiab cov txhab qab zib xws li kua txiv hmab txiv ntoo, dej qab zib xaus das, ces las tis (Jell-O® thiab lwm hom) los sis cov dej qab zib txo qhov hnyav, vim hom piam thaj nyob rau hauv cov dej qab zib ntawd tuaj yeem tsim ua rau cov tsos mob huam loj tuaj. Cov dej qab zib rau neeg laus muaj txhab ntsev thiab piam thaj thiab lwm cov es lev thaus lais (electrolytes) ntau tshaj li qhov uas cov me nyuam tseem yau xav tau. Txawm li cas los xij, cov no yeej siv tau zoo rau cov me nyuam uas loj zog lawm.

Rau cov me nyuam uas loj zog lawm, los sis cov uas haus tsis tau cov tshuaj kho qhov lub cev qhuav dej, koj tuaj yeem siv tau:

• cov dej qab zib Pedialyte®, tshwj xeeb tshaj yog thaum muab tsau txias
• yam ua kua uas lawv ib txwm haus kom tsawg

Txhab ntxiv cov khoom noj tawv kom sai li sai tau thaum uas zoo ntuav lawm. Muab koj tus me nyuam me los sis tus me nyuam cov khoom noj uas ib txwm noj raws li qhov tuaj yeem noj taus, tab sis muab kom tsawg zog thiab muab heev tshaj li cov pluas noj raws li ib txwm. Tsis txhob muab cov tshuaj zoo raws plab los sis ntuav tshwj tsis yog koj tus kws kho mob hais kom muab.

Kev Txhab Ntxiv Cov Khoom Noj:

Cov Me Nyuam Me: Muab khoom noj me nyuam mos raws li qhov tuaj yeem noj taus.

Cov me nyuam uas pib txawj mus kev thiab cov me nyuam uas loj zog lawm—pib nrog rau:

• cov kua txiv ev paus, txiv tsawb
• cov zaub ntug hauv paus uas ua siav lawm
• cov qhas npaus hais dej (carbohydrates) sib txov, xws li cov khoom noj noob qoob loo, qos yaj ywm, mov, mis yaus kawj
• cov nqaij ntshiv xws li nqaij qaib, nqaij qaib cov txwv
• lwm cov txiv hmab txiv ntoo thiab zaub raws li qhov tuaj yeem noj taus
• zam tsis txhob noj cov khoom noj uas rog los sis muaj roj (cov zaub mov kib, cov nqaij npuas kib, hnyuv ntxwm), vim cov khoom noj ntawd zom nyuaj thiab tej zaum yuav ua rau muaj tsos mob ntxiv

Muab kom ntau zog raws li qhov tuaj yeem noj taus. Feem ntau lawm cov me nyuam yuav rov los noj tau lawv tej khoom noj raws li ib txwm noj nyob rau hauv 24 teev tom qab tsis ntuav lawm.

Kuv tuaj yeem pov thaiv tau qhov kev kis mob raws plab thiab ntuav li cas?

Ua kom ntseeg siab tias txhua tus neeg nyob rau hauv tsev neeg ntxuav lawv ob txhais tes huv tom qab siv chav dej thiab hloov pawm, thiab ua ntej npaj khoom noj los sis noj khoom noj. Ntxuav koj tus me nyuam mos los sis tus me nyuam uas pib txawj mus kev ob txhais tes txawm rau pov thaiv lawv kom txhob kis kab mob mus rau lwm tus neeg los sis lwm cov khoom nyob ib ncig ntawm tsev.

Kuv yuav ua li cas kuv tus me nyuam thiaj li xis nyob?

Raws plab tuaj yeem tsim ua rau tawv nqaij ua mob loj. Tuaj yeem ua pob rau ntawm qhov chaw hnav pawm. Yog tias muaj pob rau ntawm qhov chaw hnav pawm, ces tej zaum koj yuav tsum tau siv cov tshuaj pleev tiv thaiv. Hu rau koj tus kws kho mob yog tias koj muaj cov kev txhawj xeeb.

Tej zaum kev siv cov pawm uas muaj cov hlua zawm txhais ceg (tab sis tsis zawm heev), cov ris roj hmab, los sis cov pawm ntaub nyob sab hauv cov pawm uas siv tag ces pov tseg yuav tuaj yeem pab txo tau qee cov kev tu kom huv. Cov hauv kev no yuav pab thaiv tau tej kev lo tsis huv, tab sis tej zaum cov hauv kev ntawd yuav ua rau paub nyuaj thaum muaj quav lo rau cov tawv nqaij. Nco qab ntsoov hloov pawm tas li kom heev tshaj li ib txwm.

Txhawb nqa kom cov me nyuam uas loj zog lawm lawv ntxuav lawv tus kheej kom huv tom qab tso quav txhua zaus. Tej zaum koj yuav tsum tau pab lawv kom ntau tshaj li ib txwm thaum uas muaj mob raws plab. Tej zaum kev muab lub taub dej sov los tsuag ntxuav thiab kev so kom qhuav yuav pab txo tau qhov tsis xis nyob thiab ua rau huv zog tuaj.

Kuv tsim nyog hu rau lub chaw kuaj mob thaum twg?

Hu rau koj lub chaw kuaj mob yog tias koj tus me nyuam:

• muaj cov tsos mob ntawm qhov lub cev qhuav dej uas me mus txog rau qib nrab (saib saum toj)
• tsis kam haus ub no
• muaj hnub nyoog tsawg dua 12 lub hli thiab ntuav thaum haus yam ua kua ntshiab 3 zaug los sis ntau tshaj ntawd
• ntuav mus ntev tshaj li 8 teev
• tsis tuaj yeem hloov mus noj tau cov khoom noj uas tawv nyob rau hauv 24 teev
• raws plab uas raws heev zuj zus tuaj los sis tsis zoo tom qab 48 teev (2 hnub)
• muaj ntshav, kua ntswg, los sis kua paug tshwm nyob rau hauv cov kua raws plab
• ib hnub tawm rooj ob peb zaug los sis tso quav nkos mus ntev tshaj li 2 lub lim tiam
• yog tus me nyuam uas loj zog lawm los sis tus me nyaum yaus thiab ua npaws kub tshaj li 104° F
• kiv tob hau thaum sawv ntsug
• ntuav thiab mob ntshav qab zib
• niaj hnub noj tshuaj kho mob
• tsis ntev los no raug plais plab los sis raug mob

Thaum twg kuv thiaj li tsim nyog mus cuag Chav Kho Mob Xwm Txheej Ceev?

Coj koj tus me nyuam mus cuag Chav Kho Mob Xwm Txheej Ceev yog tias koj tus me nyuam:

• muaj cov tsos mob ntawm qhov lub cev qhuav dej uas yog mob loj (saib saum toj)
• yog tus me nyuam mos uas muaj hnub nyoog tsawg dua li 2 hlis thiab ua npaws kub li 100.4° F los sis siab dua uas yog ntsuas ntawm qhov quav
• mob plab heev, caj dab txhav, los sis mob tob hau
• muaj cov kua ntuav zoo li kas fes
• muaj cov kua ntuav liab los sis ntsuab, thiab cov khoom noj uas tau noj ua ntej ntawd xim tsis zoo ib yam
• ntuav cuag li “dej txau tawm ntawm txoj xaim dej”

Puas muaj lus nug?

Daim ntawv no tsis yog qhia kiag txog koj tus me nyuam tiam sis nws yog qhia cov ncauj lus dav. Yog tias koj muaj tej lus nug, thov hu rau lub chaw kuaj mob.

Tau tshab xyuas 2/2024

Back To Top