COV KUA NTSEV NTXUAV QHOV NTSWG

Article Translations: (English) (Spanish) (Somali)

Vim li cas thiaj li siv cov kua ntsev ntxuav qhov ntswg?

• Kev ntxuav lub qhov ntswg nrog dej kua ntsev yuav pab ua kom lub qhov ntswg qhib thiab ntsib kev noj qab nyob zoo los ntawm kev ntxuav cov hnoos qeev los sis cov ntswg qhuav tawm.
• Pab txhim kho kev ua hauj lwm ntawm cov plaub qhov ntswg me (cilia) uas pab muab cov hnab ntim pa hauv qhov ntswg (sinus) tawm. Cov plaub qhov ntswg me yog cov muaj ntsis zoo li plaub hau me heev ntawm cov tsig nqaij uas nyob kem rau lub qhov ntswg thiab cov hnab ntim pa hauv qhov ntswg.
• Pab tiv thaiv kev sib kis kab mob rau cov hnab ntim pa hauv qhov ntswg thiab txo qis kom ntswg txhob los rau sab tom qab lub qhov ntswg.
• Pab ua kom lub qhov ntswg hnov xis nyob zog tuaj los ntawm kev ua kom cov hlab nqaij kua ntswg noo tuaj.

Kuv yuav tuaj yeem mus nrhiav tau cov tshuaj kua ntsev ntxuav qhov ntswg tau qhov twg?

Koj tuaj yeem yuav tau cov tshuaj kua ntsev ntxuav qhov ntswg tau ntawm lub khw muag tshuaj los sis koj tuaj yeem ua cov kua ntsev ntxuav no tau ntawm koj tus kheej (saib cov hauv qab no):

Kev sib tov ua cov tshuaj kua ntsev:

1. Ntxiv li 1 khob (237 ml) dej huv los mus ntxuav lub taub ntim. Yog tias koj siv dej ciav, muab rhaub ua ntej kom tua kab mob tso thiab cia kom txias kom txog ntua rau thaum nws sov so/li qhov kub txias hauv chav nyob. Cov dej uas twb tau muab lim thiab ua osmosis lawm los yuav tsum tau muab rhaub ib yam nkaus li thiab. Koj tuaj yeem khaws cov dej rhaub cia rau hauv lub taub ntim dej huv txog li 3 hnub los yeej tau.
2. Muab cov ntsev tsau los sis cov ntsev ntim taub li ½ diav noj mov (2.5 g) rau hauv cov dej.
3. Muab cov hmoov siv cub zaub li ½ diav noj mov (2.5 g) rau hauv.

Koj tuaj yeem muab cov kua tshuaj ntsev uas yus ua yus khaws cia rau ntawm qhov kub txias hauv chav nyob li 3 hnub.

Kuv yuav npaj kuv tus me nyuam li cas?

1. Siv lo lus nkag siab yooj yim los piav qhia txog qhov txheej txheem yuav ua. Piav qhia txog qhov txheej txheem ua ntej mam ua.
2. Rau cov me nyuam yaus, yuav pab tau zoo uas yuav pib nrog kev tsuag rau lub qhov ntswg kom hnov noo sab hauv qhov ntswg tso (kev tsuag kua ntsev tsuas yog cov lwg dej uas ua rau noo sab hauv qhov ntswg xwb. Feem ntau yuav tsis txaus los kho tau qhov kev txhaws ntswg los sis kev los ntswg li).
3. Thaum uas koj tus me nyuam swm rau qhov kev tsuag cov kua ntsev lawm, tom qab ntawd mus ua kev siv kua ntsev yaug lub qhov ntswg kom thoob.
4. Kev siv kua ntsev yaug tuaj yeem ua rau hnov kub lug hauv thawj ob peb feeb uas koj siv. Cov me nyuam yaus feem coob yuav swm rau kev yaug qhov ntswg tom qab siv ob peb zaug lawm.

Yuav ua tau li cas?

1. Ntxuav koj txhais tes nrog xab npum thiab dej los sis cov tshuaj ntxuav tes yam tsawg kawg li 30 feeb.
2. Ntxiv tshuaj rau lub hwj ntxuav qhov ntswg (muaj nyob rau hauv khw muag tshuaj) nrog cov dej lim los sis dej rhaub li 8 ooj los sis 1 khob. Ntxiv cov kua ntsev uas yuav los tom khw muag tshuaj los sis cov ntsev uas yus tov yus rau. Kaw lub hau ntawm lub hwj kom ruaj thiab tso ib tug ntiv tes tuav saum lub hau thiab co kom sib tov kom tag.
3. Kom koj tus me nyuam mus sawv ntawm lub dab dej ib sab thiab muab lub hau ntsaws mus rau koj tus me nyuam lub qhov ntswg thiab maj mam nyem (tsis txhob ntsaws lwm lub qhov ntswg).
4. Tsom qhov ntawm cov kua ntsev mus rau sab tom qab ntawm koj tus me nyuam lub taub hau, tsis yog tsa mus rau sab saud.
5. Cov tshuaj kua ntsev yuav tsum nkag ntawm qhov ntswg thiab mus tawm ntawm lub qhov ncauj los sis ib sab qhov ntswg sab tod.
6. Kom koj tus me nyuam maj mam tshuab qhov ntswg tom qab siv kua ntsev yaug tag lawm.
7. Ntxuav lub hwj txhua hnub.

Txhawm rau kom tsis txhob kis kab mob, yuav tsum tau ntxuav thiab tua kab mob hauv lub hwj txhua hnub.

1. Ntxuav ntug, tus kav thiab lub hwj nrog cov dej tso ntawm tus kais dej.
2. Ntim hauv lub hwj nrog dej lim los sis dej rhaub thiab ntxiv ob peb tee kua xab npum rau hauv lub hwj. Kaw lub hau thiab tus kav nrog lub hwj, cia koj tus ntiv tes rau ntawm qhov chaw qhib thiab co lub hwj kom siv zog. Nyem lub hwj yam siv zog tshaj plaws kom cov khoom ntsoog kom tag.
3. Ntxuav cov xam npum ntawm lub hwj nrog cov dej lim los sis dej rhaub dua ib zaug ntxiv. Tso cov dej phwj tawm ib co.
4. Cia lub hwj sab ntub, lub hau thiab tus kav tso rau hauv lub microwave (lub lauj kaub). Tso kom hluav taws kub li 40-60 vib nas this. Qhov no yuav pab tua cov kab mob ntawm lub hwj.
5. Cia kom qhuav rau ntawm daim ntaub so tes uas huv si.

Lwm cov tswv yim/cov kev pom zoo:

• Siv cov kua ntsev yaug qhov ntseg UA NTEJ koj tus me nyuam yuav siv lwm cov tshuaj rau qhov ntswg. Kev yaug yuav pab kom lub qhov ntswg thiab cov hnab ntim pa hauv qhov ntswg nqus tau (cov) qhov tshuaj zoo.

Puas muaj lus nug?

Cov ncauj lus no tsis yog tshwj xeeb kiag rau koj tus me nyuam tab sis muab los ua ncauj lus qhia dav xwb. Yog tias koj muaj lus nug dab tsi, ces thov hu rau koj lub chaw kuaj mob.

Updated 11/2024

Back To Top