Antibiotics, How They Work (Hmong)

Thaum Uas Yuav Tsum Tau Siv Cov Tshuaj Tua Kab Mob: Txoj Hau Kev Saib Xyuas Kho Mob Rau Koj Tus Me Nyuam

Cov tshuaj tua kab mob yog cov tshuaj uas kho cov kev sib kis kab mob uas tau tshwm sim los ntawm cov kab mob hu ua kab mob npev taws lias. Koj tus me nyuam muaj kev sib kis kab mob uas tau tshwm sim los ntawm tus kab mob npev taws lias thiab yuav tsum tau noj cov tshuaj tua kab mob kom thiaj li zoo tuaj. Yog xav kom qhov tshuaj tua kab mob ua hauj lwm tau zoo, koj tus me nyuam yuav tsum tau noj kom raws nkaus li kws kho mob sau qhia.

• Khaws cov tshuaj kom raws li cov lus qhia ntawm lub hnab ntim tshuaj. Qee cov tshuaj tua kab mob yuav tsum tau muab khaws cia hauv lub tub txias. Nug tus kws muab tshuaj yog tias koj tsis paub tseeb.
• Muab tshuaj uas kws kho mob muab los rau koj tus me nyuam noj kom raws li lus qhia:
  • Ua raws li cov lus qhia hais txog seb yuav muab tshuaj tua kab mob rau noj thaum twg thiab tas li npaum li cas.
  • Muab rau koj kom txwm raws li kws kho mob qhia, txawm tias koj tus me nyuam hnov tias zoo zog tuaj lawm los xij.
  • Yog tias kws kho mob pom zoo, kom koj tus me nyuam noj nrog khoom noj los tau.
  • Yog tias kws kho mob pom zoo, kom koj tus me nyuam caiv qee yam khoom noj thaum noj cov tshuaj.
  • Yog tias koj tus me nyuam tsis tau noj ib pluag, ces muab lwm pluas rau noj raws li kws kho mob qhia thiab noj kom raws sij hawm li ntawd txuas ntxiv mus. Tsis txhob muab rau noj kom ntau tshaj ib pluag toj ib zaug li kws kho mob qhia ntawd.
• Qee zaum kev noj cov tshuaj tua kab mob tuaj yeem ua rau mob plab tshaib los sis raws plab tau. Nug koj tus kws txawj ua hauj lwm ntsig txog kev saib xyuas kho mob rau fab kev noj qab haus huv seb koj tus me nyuam puas tsim nyog noj cov tshuaj probiotic. Cov tshuaj probiotic yog tus kab mob npev taws lias "zoo" uas pab kom cov plab hnyuv muaj qhov zoo tuaj.
• Yog tias tseem tshuav tshuaj seem tom qab koj tus me nyuam noj tag nrho cov pluas tshuaj uas kws kho mob muab lawm, tsis txhob muab khaws cia rau koj tus me nyuam los sis lwm tus siv tom ntej lawm. Muab cov tshuaj uas seem ntawd pov tseg los ntawm lub khoos kas muab cov tshuaj rov qab nyob hauv koj lub zej zog. Yog tias ho tsis muaj cov khoos kas twg li, muab cov tshuaj los tov nrog cov quav kas fes uas siv tas lawm, av, los sis cov tshauv rau miv tso quav. Muab cov khoom siv tov ntawd tso rau hauv ib lub hnab kaw ruaj ua ntej muab tso rau hauv lub thawv rau khib nyiab. Tshem daim ntawv nplaum muab lus qhia uas muaj koj tus me nyuam cov ntaub ntawv qhia paub tawm ntawm lub taub tshuaj los sis pob tshuaj thiab muab dua pov tseg ua ntej muab rov los siv dua los sis muab pov tseg.

Hu rau koj tus kws txawj ua hauj lwm ntsig txog kev saib xyuas kho mob rau fab kev noj qab haus huv yog tias...

Koj tus me nyuam:

• tsis zoo tuaj nyob hauv 48 teev txij thaum pib noj cov tshuaj tua kab mob
• muaj ua paws uas tsis txawj zoo ntev tshaj 48 teev tom qab pib noj cov tshuaj tua kab mob
• pib mob plab, xeev siab, ntuav, los sis raws plab
• pom muaj ntshav nyob hauv nws cov quav
• tab tom ntuav
• noj cov tshuaj tua kab mob nyuaj
• pom tawm pob uas nyuam qhuav pom tawm
• saib zoo li yim huam mob hnyav tuaj

Mus rau tom Chav ER yog tias...

Koj tus me nyuam:

• ua tsis taus pa
• nqos tsis taus mov
• caj pas los sis tus nplaig o

Tus kab mob npev taws lias yog dab tsi?

Tus kab mob npev taws lias yog cov kab mob. Qee hom kab mob npev taws lias yeej zoo rau peb, tab sis lwm hom yuav ua rau peb muaj mob tau. Thaum tus kab mob npev taws lias uas muaj kev phom sij nkag tau rau hauv lub cev thiab tsim muaj ntau tuaj uas hu ua kev sib kis ntawm tus kab mob npev taws lias. Tus kab mob npev taws lias muaj qhov sib txawv los ntawm lwm hom kab mob xws li cov kab mob vais lav.

Cov tshuaj tua kab mob ua hauj lwm li cas?

Cov tshuaj tua kab mob kho cov kev sib kis kab mob los ntawm kev mus tua cov kab mob npev taws lias los sis mus nres tus kab mob npev taws lias kom tsis txhob loj tuaj thiab tsis txhob tsim muaj ntau tuaj. Cov tshuaj tua kab mob tsuas yuav kho tau cov kev sib kis kab mob uas tshwm sim los ntawm tus kab mob npev taws lias nkaus xwb. Lawv kho tsis tau cov kev sib kis kab mob uas tshwm sim los ntawm cov kab mob vais lav (xws li mob khaub thuas los sis ua daus no).

Vim li cas kuv thiaj li tsim nyog muab tshuaj rau kuv tus me nyuam noj kom tag yog tias kuv tus me nyuam pib zoo tuaj lawm?

Kev nres noj cov tshuaj tua kab mob ntxov tsuas yuav kho tau ib feem ntawm kev sib kis kab mob xwb, uas yuav ua rau kev sib kis kab mob rov qab mob dua tau. Ces tej zaum yuav ua rau kho tau kev sib kis kab mob nyuaj zog tuaj lawm yav tom ntej thiab. Yog li koj tus me nyuam tsim nyog noj kom tag cov pluas tshuaj raws li kws kho mob qhia.

KidsHealth content from 9/2023

Back To Top