Mob hawb pob

Article Translations: (English) (Spanish) (Somali)

Mob hawb pob yog ib tug kab mob ntsws uas kho zoo tsis tu qab (mob mus rau ncua sij hawm ntev). Tab txawm tias thaum koj twb tsis muaj cov tsos mob lawm los, koj yeem tseem hawb pob. Qhov no yog vim kev mob voos o uas kho zoo tsis tu qab nyob rau hauv cov hlab pa ntawm koj ob nplooj ntsws. Nws yog qhov tseem ceeb uas yuav tau ua raws li koj Lub Phiaj Xwm Kev Nqis Tes Kho Mob Hawb Pob los tswj koj tus mob hawb pob.

Kev ua pa raws li ib txwm

Thaum koj ua pa, cov cua yuav nkag mus los ntawm koj lub qhov ntswg thiab lub qhov ncauj. Nws yuav nkag mus rau hauv koj txoj hlab ua pa, yuav mus raws koj cov hlab pa loj thiab me thiab nkag mus rau hauv cov zais pa.

Mob hawb pob huam tuaj los sis ua mob loj tuaj:

Ncua sij hawm mob hawb pob huam tuaj:

1. Cov leeg ncig cov hlab pa yuav nruj tuaj, uas tsim ua rau cov hla pa me zog
2. Txheej sab hauv ntawm cov hla pa yuav o tuaj thiab mob voos
3. Cov hnoos qeev tuab, uas txhaws cov hlab pa

Cov kev hloov pauv no yuav tsim ua rau cua nkag mus thiab tawm ntawm ob nplooj ntsws tau nyuaj. Tej zaum koj yuav muaj ib qho los sis tag nrho cov tsos mob txuas mus no:

• Hnoos
• Ua pa hnov suab nrov
• Txog siav
• Ceev hauv siab

Dab tsi tsim ua rau mob hawb pob huam tuaj?

Cov yam uas tsim ua rau mob hawb pob huam tuaj yog tau hu ua cov tsim ua rau tshwm sim. Tej zaum txhua tej tus neeg yuav muaj cov tsim ua rau tshwm sim sib txawv. Cov tsim ua rau tshwm sim yog mob ua daus no, haus

luam yeeb, fab tshuaj-khoom noj, huab cua, los sis kev tawm dag zog. Nws yog qhov tseem ceeb uas yuav tau kawm paub txog tias koj cov tsim ua rau tshwm sim yog dab tsi txhawm rau kom koj tuaj yeem zam tau lawv.

Txoj hauv kev kho qhov mob uas huam tuaj

Koj yuav ua hauj lwm nrog rau koj tus kws kho mob los tsim kho Lub Phiaj Xwm Kev Nqis Tes Kho Mob Hawb Pob. Koj Lub Phiaj Xwm Kev Nqis Tes Kho Mob Hawb Pob yog lub phiaj xwm los tswj koj tus mob hawb pob txhua hnub thiab tej yam uas yuav ua thaum koj tus mob hawb pob huam loj tuaj.

Lub phiaj xwm yuav suav nrog:

• Cov tsim ua rau tshwm sim thiab txoj hauv kev zam lawv
• Qhov tshuaj uas yuav tau siv txhua hnub (Cheeb Tsam Xim Ntsuab)
• Cov tsos mob uas qhia ua rau paub thaum tseem ntxov ntawm tus mob hawb pob uas huam tuaj thiab txoj hauv kev kho (Cheeb Tsam Xim Daj)
• Lub sij hawm thaum yuav tau hu rau tus kws kho mob (Cheeb Tsam Xim Liab)

Tshuaj Kho Mob Hawb Pob

Muaj ob hom tshuaj tseem ceeb: tshuaj cawm siav (los sis kev txo qhov mob/tshuaj txo qhov mob kom zoo ceev) thiab tshuaj tswj qhov mob (los sis tshuaj pov thaiv).

Tshuaj cawm siav/tshuaj txo qhov mob muaj xws li cov tshuaj ua kom txoj hlab ua pa khoob loj (tshuaj albuterol) los sis cov tshuaj steroid (tshuaj ua kua los sis tshuaj ntsiav).

• Cov tshuaj ua kom txoj hlab ua pa khoob loj pab tau los ntawm kev cia cov leeg nqaij ncig cov hlab pa so txhawm rau kom cua tuaj yeem nkag thiab tawm tau yooj yim ntxiv. Cov tshuaj ntawd raug siv nyob rau ncua sij hawm tus mob hawb pob huam tuaj txhawm rau txo qhov hnoos, ua pa nrov suab, thiab txog siav. Koj tsim nyog pib siv cov tshuaj no thaum muaj thawj qhov tsos mob ua daus no. Qhov tshuaj no yuav raug teev tseg rau hauv cheeb tsam xim daj ntawm koj lub phiaj xwm kev nqis tes kho mob hawb Yog tias kev tawm dag zog yog ib yam ntawm koj cov tsim ua rau tshwm sim, ces tej zaum koj kuj yuav tau txais lus qhia los siv qhov tshuaj no ntev li 10-15 feeb ua ntej tawm dag zog txhawm rau pov thaiv qhov hnoos thiab/los sis qhov txog siav ncua sij hawm tawm dag zog.

• Cov tshuaj steroid pab tau los ntawm kev txo qhov o thiab cov hnoov qees nyob rau sab hauv ntawm cov hlab pa. Cov tshuaj ntawd pib ua hauj lwm nyob rau thaj tsam li 6-12 teev thiab yuav tsum tau siv ncua sij hawm tus mob hawb pob huam tuaj thaum uas qhov tshuaj cawm siav pab tsis tau. Qhov tshuaj no yuav raug teev tseg rau hauv cheeb tsam xim liab ntawm koj lub phiaj xwm kev nqis tes kho mob hawb Noj qhov tshuaj no nrog rau khoom noj txhawm rau pab pov thaiv cov feem cuam tshuam tsis zoo. Lub hom phiaj yog yuav tsum tau noj qhov tshuaj no kom tsis pub tshaj ib xyoos ob zaug.

Cov tshuaj tswj qhov mob muaj xws li cov tshuaj steroid hom nqus thiab cov tshuaj leukotriene.

• Cov tshuaj steroid hom nqus pab tau los ntawm kev txo qhov o, mob voos, thiab muaj hnoos qeev. Cov tshuaj ntawd yuav tsis zoo ib yam li cov tshuaj steroid uas tsim leeg nqaij, thiab cov tshuaj ntawd muaj kev nyab xeeb rau kev siv txhua hnub. Vim cov tshuaj ntawd raug nqus mus rau hauv ob nplooj ntsws (thiab tsis noj nqos mus), cov tshuaj ntawd thiaj li muaj cov feem cuam tshuam tsis zoo tsawg dua li qhov tshuaj steroid uas noj ntawm ncauj. Yog tias cov tshuaj ntawd yog ib feem ntawm koj lub phiaj xwm kev nqis tes kho mob hawb pob, ces cov tshuaj ntawd yuav raug teev tseg rau hauv cheeb tsam xim ntsuab. Yuav tsum tau siv cov tshuaj ntawd txhua hnub, txawm tias koj muaj kev noj qab nyob zoo lawm los xij, txhawm rau tswj koj tus mob hawb pob thiab pov thaiv tus mob hawb pob uas huam tuaj. Siv lub cuab yeej kem ncua sib nrug thiab npuav dej yaug qhov ncauj thiab muab nti tawm tom qab siv qhov tshuaj no txhawm rau pov thaiv cov feem cuam tshuam tsis

• Cov tshuaj leukotriene (xws li tshuaj montelukast los sis singulair) pab tau los ntawm kev txo qhov o thiab cov hnoov qeev. Yog tias cov tshuaj ntawd yog ib feem ntawm koj lub phiaj xwm kev nqis tes kho mob hawb pob, ces cov tshuaj ntawd yuav raug teev tseg rau hauv cheeb tsam xim ntsuab. Yuav tsum tau siv cov tshuaj ntawd txhua hnub, txawm tias koj muaj kev noj qab nyob zoo lawm los xij, txhawm rau

tswj koj tus mob hawb pob thiab pov thaiv tus mob hawb pob uas huam tuaj. Qhov tshuaj no yog tshuaj ntsiav thiab tsim nyog noj thaum tsaus ntuj. Cov kev hloov pauv kev coj cwj pwm los sis txoj kev xav tej zaum yuav yog feem cuam tshuam tsis zoo; qhia rau koj tus me nyuam tus kws kho mob paub yog tias qhov no tshwm sim.

Lub Phiaj Xwm Kev Nqis Tes Kho Mob Hawb Pob

• Cheeb tsam xim ntsuab txhais tau tias: Kuv hnov tau xis nyob thiab tsis muaj cov tsos
  • Siv koj qhov tshuaj tswj qhov mob txhua hnub
• Cheeb tsam xim daj txhais tau tias: Kuv hnov tau tsis xis nyob. Tej zaum koj yuav muaj cov tsos mob qhia ua rau paub thaum tseem ntxov xws hnoos nrog rau ua daus
  • Pib siv koj qhov tshuaj cawm siav nyob rau tam sim no
• Cheeb tsam xim liab txhais tau tias: Kuv hnov tau tias mob heev. Tej zaum koj yuav hnoos txhua sij hawm thiab ua pa
  • Siv cov tshuaj no tam sim no thiab hu rau koj tus kws kho mob.
• Hu rau 911 yog tias koj txhawj xeeb tias yuav dhau mus rau 30 feeb tom ntej.

Kuv yuav paub tau li cas tias tswj tau kuv tus mob hawb pob lawm?

Lub hom phiaj yog ua kom nyob rau hauv Cheeb Tsam Xim Ntsuab. Tswj tau koj tus mob hawb pob lawm yog tias koj tuaj yeem:

• Pw tsaug zog txhua hmo
• Tsis hnoos los sis tsis ua pa nrov suab ncua sij hawm nruab hnub los sis hmo ntuj
• Hnov nquag plias
• Mus kawm taus ntawv los sis mus ua taus hauj lwm

Kev soj qab saib xyuas:

Mus ntsib koj tus kws kho mob txhua - txhua 6 lub hli, los sis heev tshaj ntawd raws li koj tus kws muab kev pab cuam fab kev kho mob cov lus qhia.

• Ua raws li koj lub phiaj xwm kev nqis tes kho mob hawb pob
• Rov sau ntawv txib yuav koj qhov tshuaj dua (tsis txhob cia tag)
• Muaj lub tshuaj nqus cawm siav nyob ntawm tsev thiab nyob ntawm tsev kawm ntawv/chaw zov me nyuam nruab hnub
• Khaws cia koj qhov tshuaj rau ntawm qhov chaw uas ntsia pom thiab nqa mus siv nrog rau koj cov hauj lwm uas hniaj hnub ua kom koj thiaj li nco qab siv koj qhov tshuaj ntawd

• Faib tawm koj lub phiaj xwm kho mob hawb pob rau tsev kawm ntawv thiab chaw zov me nyuam nruab hnub

Puas muaj lus nug?

Daim ntawv no tsis yog qhia kiag rau koj tus me nyuam xwb, tab sis nws muab cov ntaub ntawv raws li ncua dav. Yog tias koj muaj tej lus nug, thov hu rau lub chaw kuaj mob. Peb xav kom koj thiab koj tus me nyuam koom nrog lub khoos kas kev kawm txog mob hawb pob txhawm rau kawm paub ntxiv txog cov hauv kev tswj tus mob hawb pob. Nug koj tus kws kho mob, tus kws tu mob, los sis Mes Kas Lub Koom Haum Kho Mob Ntsws rau ntaub ntawv kev paub txog cov khoos kas uas muaj.

Yog tias xav nyeem ntxiv hais txog qhov no thiab lwm cov ncauj lus hais txog kev noj qab haus huv, ces thov hu rau los sis mus saib Lub Chaw Hauj Lwm Txog Peev Txheej Rau Tsev Neeg lub tsev saib ntawv, los sis mus saib peb lub vev xaib: childrensMN.org.

Reviewed 3/2024

Back To Top