MOB NTSWS O

Article Translations: (English) (Spanish) (Somali)

Mob ntsws o yog dab tsi?

Mob ntsws o (new-mohn-ya) yog qhov kev kis mob rau ob nplooj ntsws uas tshwm sim los ntawm tus npev taws lias, vais lav, los sis kab mob los ntawm nceb. Dhau li no lawm nws kuj tshwm sim los ntawm kev nqus pa, uas yog thaum muaj qee yam nkag mus rau hauv ob nplooj ntsws uas tsis tsim nyog nyob rau ntawd (xws li qaub ncaug, khoom noj, cov kua ntuav, los sis cov kua qaub nyob rau hauv plab). Qhov kev kis mob tuaj yeem tsim ua rau o thiab muaj hnoos qeev nyob rau hauv ob nplooj ntsws, uas tsim ua rau ua pa nyuaj. Nws yog ib qho ntawm cov kev kis mob txoj hla ua pa theem qis zog uas nquag pom muaj heev tshaj plaws nyob rau hauv cov me nyuam yaus.

Dab tsi yog cov tsos mob ntawm qhov mob ntsws o?

• hnoos
• ua npaws
• ua pa nyuaj
• mob hauv siab
• mob plab los sis ntuav
• noj khoom noj nyuab

Kuv tsim nyog saib xyuas kuv tus me nyuam li cas?

Tej zaum koj tus kws pab kho mob yuav txib yuav qhov tshuaj tiv thaiv kab mob txhawm rau tawm tsam qhov kev kis kab mob yog tias nws vim yog npev taws lias. Nws yog qhov tseem ceeb uas yuav tau noj kom tag txhua qhov tshuaj raws li tau txib yuav. Txawm tias tom qab koj tus me nyuam noj qhov tshuaj tiv thaiv kab mob tag thiab hnov zoo zog lawm los xij, tej zaum lawv yeej tseem yuav hnoos mus ntxiv li ntau lub lim tiam.

Txhawb kom haus yam ua kua ntxiv. Qhov no yuav tsim ua rau cov hnoov qeev nyias zog tuaj txhawm rau kom tuaj yeem hnoos tau thiab tawm ntawm ob nplooj ntsws.

Rau thaum ua npaws, tej zaum koj yuav tuaj yeem muab tau qhov tshuaj acetaminophen (Tylenol® los sis lwm hom tshuaj) los sis ibuporfen (Motrin® los sis lwm hom tshuaj) raws li tau qhia, los sis txhua - txhua 6 teev raws li qhov yuav tsum tau noj. Tsis TXHOB muab cov tshuaj ibuprofen rau cov me nyuam mos uas muaj hnub nyoog qis dua 6 lub hli noj. Tsis txhob muab qhov tshuaj zoo hnoos los sis ua daus no rau cov me nyuam uas muaj hnub nyoog qis dua 6 xyoo noj. Yog tias koj tus me nyuam muaj hnub nyoog siab dua li 12 hlis, ces tuaj yeem muab tau zib ntab li ib los sis ob diav me rau lawv haus nyob rau thaum tsaus ntuj txhawm rau kho qhov hnoos.

Xyaum nyiam huv txhawm rau pov thaiv kev kis cov kab mob uas tsim ua rau muaj mob ntsws o. Qhov no suav nrog kev muab xab npum thiab dej ntxuav ob txhais tes kom ntev li 20 vib nas this thiab kev qhia koj tus me nyuam kom hnoos los sis txham rau hauv Kleenex los sis lawv lub luj tshib, tsis yog lawv ob txhais tes. Dhau li no lawm nws kuj suav nrog kev tsis txhob sib koom khob haus dej los sis cov khoom siv noj ub no.

Kuv tsim nyog hu rau lub chaw kuaj mob thaum twg?

Hu rau koj lub chaw kuaj mob yog tias koj tus me nyuam yog:

• tshuaj zoo ntuav.
• pw tsaug zog ntev tshaj li ib txwm.
• tsis kam haus ub no.
• ua pa ceev los sis ua pa nrov suab.
• tseem ua npaws 48 teev tom tab pib noj qhov tshuaj tiv thaiv kab mob yog tias lawv tau txib yuav ib qho.

Thaum twg kuv thiaj li tsim nyog mus cuag Chav Kho Mob Xwm Txheej Ceev?

Coj koj tus me nyuam mus cuag Chav Kho Mob Xwm Txheej Ceev yog tias lawv:

• cov tawv nqaij saus (kev rub daim tawv nqaij nyob ncig lub caj dab los sis ncua ntawm cov tav rov qab rau hauv nrog cev txhua zaus ua pa), ua pa nrov suab, los sis lawv ob lub qhov ntswg khoob loj thaum ua pa.
• ib ncig ntawm lub qhov ncauj xiav los sis daj.
• lawv ob daim di ncauj, cov pos hniav, cov rau tes daj, txho, dawb, los sis lawv ob lub qhov muag dawb.

Puas muaj lus nug?

Daim ntawv no tsis yog qhia kiag rau koj tus me nyuam xwb, tab sis nws muab cov ntaub ntawv raws li ncua dav. Yog tias koj muaj tej lus nug, thov hu rau lub chaw kuaj mob.

tau hloov kho 2/2024

Back To Top