NTSEJ MUAG TAWG LOV (DHAU NTAWM CAJ NTSWG TAWG LOV)

Article Translations: (English) (Spanish) (Somali)

Ntsej muag ncua nruab nrab tawg lov yog dab tsi?

Ntsej muag ncua nruab nrab tawg lov yuav cuam tshuam nrog cov pob txha ntawm pob pliaj mus txog rau pob tsaig (qab qhov ncauj). Yuav ntsib tsawg nrog cov neeg mob uas yog me nyuam yaus. Muaj ntau yam sib txawv heev ntawm kev lov suav muaj kev tawg lov ntawm LeFort, kev tawg lov ntawm Naso, thiab kev tawg lov ntawm qab ces kaum qhov muag.

Yam uas yuav cia siab tau rau kev ua hauj lwm ntawm lub ntsej muag tawg lov?

Koj tus me nyuam yuav raug muab xa mus kho nyob rau tom tsev kho mob thaum raug mob thawj zaug los sis tau soj qab taug saib tom qab phais tas. Nyob ntawm seb hom pob txha los sis qhov laj thawj ua rau raug mob, koj tus me nyuam qhov kev kuaj ntsuam xyuas yuav suav nrog CT kev yees duab saib, kev kuaj ntsuam xyuas rau tag nrho cov kev raug mob, thiab kuaj hniav.

Yuav tu kev tawg lov ntawm ntsej muag ncua nruab nrab tau li cas?

Koj tus me nyuam qhov pob txha tawg lov tej zaum yuav tau txais kev tu kho nrog kev soj ntsuam los sis kev phais nyob ntawm qhov raug mob. Yog tias tsis tsim nyog phais, koj tus me nyuam yuav tau noj tej khoom noj mos-mos muag-muag rau ob peb lub lim tiam thiab tsis txhob mus ua kis las. Yog tias xav tau kev phais, koj tus me nyuam yuav muaj kev phais hauv qab daim di ncauj (sublabial), ntawm qhov plaub muag, hauv daim tawv muag hauv qab, los sis cov kab plaub hau mos-mos saum pob pliaj (bicoronal). Tej zaum yuav siv cov ntaub los sis cov ntsia hlau me-me txhawm ua rau kom cov pob txha me hauv los sib dhos.

Yuav xav li cas tom qab phais rau pob txha ntsej muaj ncua nruab nrab tawg lov?

Yog tias muaj kev phais hauv lub qhov ncauj, koj tus kws kho mob yuav muab tshuaj ntxuav lub qhov ncauj thiab cov khoom noj muag-muag los sis ua kua.

Yog tias koj tus me nyuam muaj qhov phais ntawm daim tawv muag hauv qab, koj tus kws kho mob yuav muab tshuaj tee los sis tshuaj pleev thiab tshuaj xyuas qhov muag ntxiv.

Yog tias koj tus me nyuam muaj qhov phais cheeb tsam cov plaub hau, qhov kev phais yuav raug tso tseg li ob peb hnub. Feem natu lawm lub qhov muag yuav o heev li tom qab phais tiav.

Koj tus kws kho mob me nyuam yaus yuav sau tshuaj tua kab mob nyob ntawm seb hom thiab qhov raug mob npaum li cas.

Pob txha puab tsaig tawg lov yog dab tsi?

Pob txha puab tsaig tawg lov yog kev tawm lov ntawm lub ntsej muag uas nquag ntsib tshaj plaws li uas ua rau tuaj kho mob tas li tom tsev kho mob. Txawm hais tias pob txha puab tsaig tawg lov tsis tshua muaj tshwm sim rau cov me nyuam yaus, tab sis nquag tshwm sim nrog rau cov tub ntxhais hluas thiab cov hluas. Feem ntau lawm nyiam tshwm sim los ntawm kev ua tsheb cav sib tsoo thiab tsheb kauj vab sib tsoo, kev raug mob los ntawm kev ua kis las, thiab ntog.

Yuav ntsuas saib pob txha puab tsaig tawg lov tau li cas?

Koj tus me nyuam yuav tau xoo duab x-ray los sis yees duab CT txhawm rau saib pob txha tawg lov ntawm lub puab tsaig. Kev kuaj ntsuam xyuas lub cev yuav suav nrog kev ntsuam xyuas ntawm cov hniav xoob los sis hniav lem. Yuav tau kuaj xyuas ntawm lub puab tsaig sab sauv thiab sab hauv txhawm rau kom paub tseeb tias koj tus me nyuam cov hniav nyob sib txhij txhua tus.

Pob txha puab tsaig tawg lov yuav kho tau li cas?

Feem ntau lawm pob txha puab tsaig tawm lov yuav tsum tau phais. Txawm hais tias tus kws phais ENT tuaj yeem koom nrog hauv kev tshuaj xyuas thiab kev tswj hwm ntawm koj tus me nyuam cov pob txha hauv lub puab tsaig, feem ntau lawm cov pob txha ntawm tus me nyuam yaus raug tswj los ntawm tus kws phais qhov ncauj. Kev phais feem ntau lawm yog phais rau sab hauv lub qhov ncauj hauv qab cov pos hniav, tab sis qee zaus kuj yuav tau phais sab phlu los sis caj dab. Cov pob txha tawg lov feem ntau lawm yog nyob rau hauv qhov chaw nrog cov hlau phais nyias-nyias phais uas me-me.

Txawm hais tias nws tsis yog qhov nyiam tshwm sim hauv niaj hnub no los xij, koj tus me nyuam yuav tsum tau rau cov hniav sib txuas ua ke tom qab phais tas. Yog tias zoo li ntawd lawm, koj tus me nyuam yuav tsum tau noj cov zaub mov ua kua li ob peb lub lim tiam.

Puas muaj cov lus qhia uas kuv yuav tau coj raws ua ntej kev phais?

Koj tus me nyuam yuav tsum tau kuaj lub cev ntaj ntsug los ntawm nws tus kws kho mob me nyuam yaus los sis tus kws kho mob rau tsev neeg hauv ob peb hnub ua ntej phais tas txhawm rau kom paub tseeb tias lawv muaj kev noj qab haus huv. Ntau zaus uas koj tus me nyuam yuav tau mus kuaj mob nrog Lub Tuam Tsev Hauj Lwm Saib Xyuas Xwm Ceev los sis pab pawg neeg Saib Xyuas Kev Raug Mob raws li kev raug mob ntawm ntsej muag. Tus kws kho mob uas koj mus ntsib yuav tau ua kom tiav tsab ntawv Keeb Kwm thiab Lub Cev Ntaj Ntsug uas peb lub chaw hauj lwm muab. Koj yuav tsum nqa tsab ntawv teb tiav nrog koj tuaj rau hnub phais.

Rau koj tus me nyuam li kev nyab xeeb, nws yog ib qhov tseem ceeb heev uas cov me nyuam ntawd tshaib plab thaum tau txhaj tshuaj loog. Thov coj raws Children's Hospital Cov Kev Cob Qhia Noj thiab Haus. Yog tias koj tsis coj raws cov kev cob qhia no, yuav muab txoj kev phais koj tus me nyuam ncua tseg. Koj tus me nyuam yuav tau noj tej zaub mov mos-mos, muag-muag tom qab raug mob txawm tias ua ntej kev phais.

Kuv yuav tau ras txog dab tsi tom qab phais tag?

Cov txheej txheem feem ntau lawm siv li 2-3 teev. Koj tus me nyuam yuav tsim rov los hauv chav tso xeev tom qab kev phais. Qhov no ib txwm siv sij hawm tsis ntev dua 20 txog 40 feeb. Thaum twg koj tus me nyuam tsim meej, yuav muab nws coj mus tso rau qhov chaw yuav tso tawm kom xeev meej. Koj tuaj yeem nyob nrog koj tus me nyuam thaum nws rov qab los rau hauv thaj chaw rov feeb meej lawm. Koj tus me nyuam tej zaum yuav tau nyob hauv tsev kho mob li ib hmos tom qab kev phais mob nyob ntawm tej kev raug mob uas tshwm sim los ntawm pob txha tawg lov saum lub ntsej muag.

• Koj tus me nyuam yauv muaj kev ua zoo nkauj rau lub ntsej muag (qee zaus hu ua nqa puab tsaig) uas yuav los pab lub puab tsaig. Muaj ib qho chaw seem los tso dej txias txhawm rau los pab kev o
• Koj tus kws kho mob yuav txib yuav tshuaj ntxuav qhov ncauj sib xyaw nrog tshuaj tua kab mob
• Koj tus kws kho mob yuav txib yuav tshuaj tua kab mob thaum kis kab mob, cov hniav tsis zoo, los sis muaj mob to hauv qhov ncauj

• Koj tus me nyuam yuav tsum tsis txhob ua kis las uas yuav muaj kev siv chwv li 4 lub lim tiam
• Yeej muaj cov cev kub mus txog 102.0 F tom qab kev phais. Hu rau koj tus kws kho mob txog cov cev kub tshaj 102.0 F uas cov tshuaj acetaminophen (Tylenol) thiab/los sis Ibuprofen tsis pab kom thim
• Koj tus me nyuam tej zaum yuav muaj mob lub puab tsaig, mob ntsej muag, mob qhov muag los sis mob hniav. Qee lub sij hawm yuav hnov nws yws tias lub zeem muag pom plooj-plooj. Koj yuav siv tau tshuaj Tylenol^® (acetaminophen) los sis Children's Motrin^® (ibuprofen) pab txoj kev tsis xis nyob ib ntus no. Qee zaus yuav muaj kev txib yuav siv cov tshuaj kho mob uas muaj kuab heev.
• O nyob ib ncig ntawm lub qhov muag yog ib qho teeb meem me-me xwb. Nws yauv tshwm sim thaum sawv ntxov thiab yuav zoo nyob rau lub lim tiam tom ntej.
• Koj yuav tau daim ntawv Cov Lus Qhia Txog Kev Tso Tawm ua ntej koj mus tsev uas yuav qhia kev muab tshuaj npaum li cas thiab pes tsawg zaus.
• Koj tus me nyuam tej zaum yuav tau noj cov khoom noj haus uas ua kua los sis mos-mos, muag-muag li ob peb lub lim tiam tom qab kev phais.
• Kev tu mob tej zaum yuav muaj xws li kev ntxuav qhov ncauj, tee tshuaj rau qhov muag, los sis siv tshuaj tua kab mob.

Puas muaj lus nug?

Cov ncauj lus teev hauv phau ntawv no tsis yog teev txog koj tus me nyuam kiag. Muab cov ncauj lus no qhia ua ib yam kev pab rau peb cov neeg mob. Cov ncauj lus no yog siv ua kev qhia thiab kev faj seeb nkaus xwb thiab yuav tsum TSIS txhob muab los hloov tej tswv yim ntawm koj tus me nyuam tus kws kho mob. Yog tias koj muaj tej lus nug, thov hu rau Children's ENT Kev Phais Ntsej Muag Zoo Nkauj.

Muab xyuas 10/2022

Back To Top